مفهوم تانى للسعادة

المدونة بتاعتى أخيراً عملتها النهاردة ..... يااااه أخيراً بقالى مدونة زى الناس التانية الكتيرة اللى عندها مدونات ....أخيراً هاكتب كل اللى أنا عاوزه  فى صفحة خاصة أنا اللى مسيطر عليها .... أخيراً بقالى صوت يتسمع فى حتة ..... :)   طبعاً دة شعورى اللى ميتوصفش بإنشائى للمدونة اللى قررت أعملها وأكتب فيها اللى بفكر فيه وأفيد وأستفيد من خلالها المهم أهو شعورى بالسعادة دة هوة اللى عاوز أتكلم عنه واحد يقولى ياعم دة إحنا فى مصر مبتسمعش عن الفساد والتزوير والسرقة والنهب سعادة إيه يا معلم اللى بتتكلم عليها أقوله سعادتى إنى مصرى إتولدت على الأرض الطيبة دى ربنا خلقنى من أهلها الطيبيين أحسن ناس وأحسن بلاد الدنيا سعادتى إنى موجود إنى بأحيا كل لحظة فى حياتى مش بعيش والسلام 

السعادة من وجهة نظرى هيا اللى أنا بعمله دلوقت إنى بأشارك ومتواجد مش منطوى ومغلق ومقفل السعادة حب  جرب تعيش سعيد بحبك لربك ولوطنك ولأسرتك والناس اللى حواليك جرب وقولى وطبعاً لا هتجرب ولا هتقولى إلا لما تشارك ولو بالكلمة ولو بالتعبير ولو بالإبتسامة ولو بالتكشيرة جرب مش هتندم لا صدقنى هتعيش حياة تانية خالص  حياة صوتك فيها عالى حسك فيها مسموع رقبتك فيها طويلة  وأنا وإنت موجودين ويا تجرب تعيش سعيد يا إما ................ برضه تجرب تعيش سعيد ............ أنا سعيييييييييييييييييييييد   أنا مبسوووووووووووووووووط   أنا من مصـــــــــــــــــــــــــــــــــــــــــــــــــــــــــــــــــــــــــــــر .