وكانت فى التاريخ ثورة بس النظام مسقطش
جيبنا الديابة تحرسلنا فى العش
عالم بتكذب تخون تغدر تعيشلنا بميت وش
عشنا وشوفنا الظلم بعنينا
لا كان بإيدنا يا ناس ولا برجلينا
إحنا انكتب باليد دى بس نموت
وكل يوم الصبح ناكل فى بعضينا
عمركش مرة قابلت ظالم يعيش بأمان
عمركش شفت السجين اقوى من السجان
آهين يابلد العجايب ياموا العقول هايصة
خلصت خلاص المحاكمة قوموا بنا يلا الطبيخ كوسة وبالصلصة
هتحاكموا مين اتهبلتوا دولا الملايكة فيهم براءة ذمم وقلوب كمان خالصة
دولي .... دولي اللى خيرهم عليكم من خير بلدهم يفيض الخير على جباهكم
عمركش شوفت قتيل ودمه مالي الأرض مسحول بيتحاكم
والظالم اللى قتل من كل تهمة برئ ولا عاد فى شيئ هامم
عمركش بصيت بعينك والضي ماليها
ونور شباب مصر نور كل أراضيها
وزعفران دمهم ومسك عرق الجبين بيحنى أياديها
بقى دة مصير اللى باع حياته ودمه لاجل يفديها
آهين وآهة وجع وقلوب مليانة بالحسرة وعيون تسيل بالدم بدل الدمع من القهرة
يابلدنا دافعى وهاتي حق أولادك دولا اللى ماتوا عشان نعيش بكرة
