بلدى اللى عشت وبكرة أموت فيها
بلدى اللى بعشقها وبعشق كل مافيها
بلدى الجميلة الطيبة والخير جرى فيها
بلدى اللى عمرى ماسيب الشر ماليها
وبكرة دة لبلدى وبعده خير ليها
والنور يسرى فى جسدها ويبان كدة عليها
والحب شريانها والدفئ فى أحضانها والعشق فى عنيها
وادى احنا اهه ولادها وفى حبها ماشيين نفضل نعليها
لحد آخر نفس لهواها بنشمه ولحد حد الحب ليها ولأراضيها
بلدى اللى عشت وبكرة أموت فيها
بلدى اللى شافت وعاشت ظلم يا ما كتير فى أيامها ولياليها
غصبوها يوم مدت إيدها لأعاديها والحسرة فى قلبها والدمعة فى عنيها
بلدى اللى شربوا دمها واتبرعوا بيه بلاش لكلابها وأعاديها
بلدى اللى منعوا شبابها برة انسحل وانهان وهنا حواه بحرها ولملمت جثثه تربة فى أراضيها
بلدى اللى ليها شباب الدم زى العسل والقلب أبيض حليب من حبه بيرويها
وبإيده يعمل ويعرق ويهد ليها الجبال ويوطى آخر النهار راسه ويبوس على ايديها
حلفوا ولاد بلدى ليرجعوا مجدها وينشروا الفرحة فى ربوعها وحواريها
قاموا ولاد بلدى بالعزم ويا الجلد طالبين خلاص ليها
رافضين يشوفوا بلدهم بتتسحب من طوق لنار وساحبها حراميها
حراميها لك يوم استنى بقى يومك وخلاص مفيش رجوع ليها
فاكر أيام زمان داهية لاترجع ساعاتها ودقايقها وثوانيها
دانتم عملتم كتير دوقوا بقى اللى اتعمل واشرب فى صحة عذابكم على ايديها
بلدى اللى راجعة من تانى عروسة شباب الطرحة فوق راسها والكحل فى عنيها
يرزقها ربى الولاد صبيان كمان وبنات يعمروا فى أرضها ويباركوا خطاويها
بلدى اللى عشت وبكرة أموت فيها
ليست هناك تعليقات:
إرسال تعليق